श्री क्षेत्र तुळजापूर विकासाचा रु.१००० कोटींचा पहिल्या टप्याचा प्रारुप विकास आराखडा मंदीर महाद्वारासमोर शहरवासीय, भाविकांच्या व व्यापाऱ्यांसमोर सादर केला. सर्व भक्तांनी मिळून बघितलेले स्वप्न लवकरच सत्यात उतरणार असून आई तुळजाभवानीची सेवा करण्याची ही अद्वितीय संधी आहे. तुळजापूर विकास आराखड्याचे जनतेसमोर सादरीकरण करतानाचे क्षण माझ्या आयुष्यातील अभूतपूर्व व अविस्मरणीय क्षण आहेत.

हा आराखडा पुढील २५ वर्षाच्या गरजा लक्षात घेऊन तयार करण्यात आला आहे. कुणालाही विस्थापीत न करण्याचा यात प्रयत्न करण्यात आला आहे. गरज पडलीच तर ४-५ ठिकाणी तेथील नागरिकांशी चर्चा करुन त्यांना विश्वासात घेत तीर्थक्षेत्र तुळजापूर विकास आराखडा राबविण्याचा मानस आहे.

या प्रारुप विकास आराखडाचा पहिला टप्पा हा मंदीर परिसर असून तीर्थक्षेत्र तुळजापूर कडे येणारे व मंदीर परिसरातील रस्त्यांचा यामध्ये समावेश आहे. श्री तुळजाभवानी मंदीर प्रवेशद्वार नव्याने प्रस्तावित करण्यात आले आहे. तसेच मुख्य मंदीर गर्भगृह, मंदीर शिखर व परिसर, तिर्थकुंड, धार्मिक विधी, वाहनतळ, दर्शन मंडप थांबे, बाहेर पडण्याचा मार्ग याचा समावेश आहे. तसेच तीर्थक्षेत्र परिसरातील अती प्राचीन तिर्थकुंडांचे संवर्धन यात केले जाणार आहे. गर्दी व्यवस्थापन व नियोजनावर भर देण्यात आला आहे. मंदीर महाद्वारा समोरच्या बाजार पेठेतील दुकाने एकसारखी व ऐका रेषेत येतील.

दर्शनासाठी ऑनलाईन बुकींग सोय असून वाहनतळ येथेही दर्शन बुकिंग सोय करण्यात येणार आहे. मंदीरात अभिषेक, मुख दर्शन, पेड दर्शन, यासाठी स्वतंत्र हॉल व रांगाची व्यवस्था करण्यात आली आहे. बाहेर पडण्यासाठी ३ मार्ग प्रस्तावित केले आहेत. सध्याच्या गाभारा परिस्थितीत भाविकांना सुलभ दर्शनासाठी बदल करण्याचे नियोजन आहे. सौर उर्जेच्या माध्यमातून वीजेची गरज भागविण्यासाठी उपाययोजना केली जाणार आहे.

सुमारे १० एकर जागेमध्ये आई तुळजाभवानी माता छत्रपती शिवाजी महाराजांना भवानी तलवार देतानाचे सुमारे १०८ फूट उंचीचे शिल्प तसेच उपलब्ध पुरातन वस्तु ठेवा जतन करण्यासाठी वस्तुसंग्रहालय उभारण्यात येणार आहे. या पूर्ण जागेमध्ये बागबगीचा व ‘लाइट ॲण्ड साऊन्ड शो’ विकसित करून आकर्षक सुशोभीकरण करण्यात येणार आहे. अद्यावत भव्य नाट्यगृह उभारण्यात येणार आहे. शहराच्या बाह्य भागात सर्व सुविधायुक्त वाहन तळे उभारण्यात येणार असून येथे दर्शन बुकींग, विश्रांती भोजन अशा सुविधा उपलब्ध करून दिल्या जाणार आहेत.

हा विकास आराखडा इंटरनेट, सोशल मिडीया, व्हॉट्सॲप वर उपलब्ध करुन दिला जाणार असून याबाबतीत काही सूचना अथवा तक्रारी असल्यास शनिवार व रविवारी त्या लेखी स्वरुपात मंदिर कार्यालयात सल्लागार यांच्याकडे द्याव्यात, असे आवाहन केले. सदर विकास आराखडा संपूर्ण तुळजापूर नगरीचा कायापालट करणारा ठरणार असून या आराखड्याच्या निर्मितीसाठी आजवर सर्वांनी केलेल्या सहकार्याबद्दल आभार व्यक्त करत यापुढे देखील अधिक व्यापकरित्या आपल्या सहभागाची आवश्यकता आहे.

#तुळजापूर #मंदिर #भाविक #धाराशिव #tuljapur #temple #dharashiv